2. bairischen Beichte 10/11. Jahrhundert bairisch

Trohtin got almahtigo, dir uuirdo ih suntigo pigihtic unti sancta Mariun unti allen gotes engilun unti allen gotes heiligun unti dir gotes euuarte allero minero suntono unti allero minero missitati, de ih eo missitete odo missidahta odo missisprah vona minero toupha unzi in desin hutigun tach, dero ih gihukko odo ni gehukko, de ih uuizzunta teta odo unuuizunta, notacodo unnotac, slaphanto odo uuachanto, tages odo nahtes, in suelichero steti odo in suelichemo zite ih si gefrumeta, mit mir selbemo odo mit andremo: in ungiloubun, in zoupre, in hohmuoti, in geile, in nide, in abunste, in hazze, in viginscephte, in apulge, in meinen eidun, in luckemo urchunde, in lugunun, in manslahte, in diuvun, in notnumphtin, in pisuuiche, in untriuun, in huore, in uberligire, in piuuellida mines lichnamin, in huorlustun, in unrehter giru, in pisprahun, in dansungen, in murmulode, in lichisode, in virmanode menniscono, in unrehtero urteili, in ungihorsami, in ubarazili, in ubertrunchili, in scantlichemo gichosi, in uppigemo scerne, in spotte, in uueichmuote, in unrehtemo strite, in ruomigerne. Ih giho dir, trohtin, daz ih minemo lichnamin mera intliez dan ih scolte. Ih giho dir, trohtin, daz ih unmahtigero unti dero de in charcharo unte in andren notin uuaron ni giuuisota noh so ni gehalf so ih scolta unti so ih mahta. Ih giho dir, trohtin, daz ih hungrenta ni gilabota noh turstiga ni gitrancta noh nackota ni giuuatta...

Aus: Max Niemeyer Verlag Althochdeutsches Lesebuch