Altsächsische Beichte 10.Jahrhundert Essen altsächsisch(westfälisch)

Confessio. Ik giuhu goda alomahtigon fadar. Endi allon sinon helagon vuihethon. Endi thi godes manne. allero minero sundiono. thero the ik githahta. endi gisprak. endi gideda. fan thiu the ik erist sundia uuerkian bigonsta. Ok iuhu ik so huat so ik thes gideda thes vuithar mineru cristinhedi uuari. endi vuithar minamo gilouon uuari. endi vuithar minemo bigihton uuari. endi uuithar minemo mestra uuari. endi vuithar minemo herdoma uuari. endi uuithar minemo rehta uuari. Ik iuhu nithas. endi auunstes. hetias. endi bisprakias. Sueriannas. endi liagannias. firin lustono. endi minero gitido farlatanero. Ouar modias, endi tragi godes ambahtas. Horuuilliono. manslahtono. Ouaratas endi ouerdrankas. endi ok untidion mos fehoda endi drank. Ok iuhu ik that ik giuuihid mos endi drank nithar got. endi minas herdomas raka so ne giheld so ik scolda. endi mer terida than ik scoldi. Ik iugiuhu that ik minan fader endi moder so ne eroda endi so ne minnioda so ik scolda. Endi ok mina brothar endi mina suestar endi mina othra nahiston endi mina friund. so ne eroda endi so ne minnioda so ik scolda. Thes giuhu ik hluttarliko. that ik arma man endi othra elilendia so ne eroda. endi so ne minnioda so ik scolda. Thes iuhu ik that ik mina iungeron endi mina fillulos so ne lerda so ik scolda. Thena helagon sunnundag endi thia helagun missa. ne firioda endi ne eroda so ik scolda. Vsas drohtinas likhamon endi is blod mid sulikaru forhtu endi mid sulikaru minniu ne antfeng so ik scolda. Siakoro ne uuisoda endi im ira nodthurti ne gaf so ik scolda. Sera endi unfraha netrosta so ik scolda. Minan degmon so rehto ne gaf so ik scolda. Gasti so ne antfeng so ik scolda. Ok iuhu ik that ik thia giuuar the ik giuuerran ne scolda. Endi thia ne gisonda the ik gisonan scolda. Ik iuhu unrehtaro gisihtio. unrehtaro gihorithano. Endi unrehtaro githankono. unrehtoro uuordo. unrehtaro uuerko. unrehtaro sethlo. unrehtaro stadlo. unrehtaro gango. unrehtoro legaro. Vnrehtas cussiannias. Vnrehtas helsiannias. Unrehtas anafangas. Ik gihorda hethinnussia endi unhrenia sespilon. Ik gilofda thes ik gilouian ne scolda. Ik stal. ik farstolan fehoda ana orlof gaf. ana orlof antfeng. Meneth suor an vuiethon. Abolganhed endi gistridi an mi hadda. endi mistumft. endi auunst. Ik sundioda an luggiomo givuitscipia. endi an flokanna. Mina gitidi endi min gibed so ne giheld endi so ne gifulda so ik scolda. Vnrehto las. unrehto sang. ungihorsam uuas. Mer sprak endi mer suigoda than ik scoldi. endi mik seluon mid uuilon uuordon endi mid uuilon uuerkon endi mid uuilon githankon mid vuilon luston mer unsuuroda than ik scoldi. Ik iuhu that ik an kirikun unrehtas thahta. endi othra merda theru helagun lecciun. Biscopos endi prestros ne eroda endi ne minnioda so ik scolda. Ik iuhu thes allas the ik nu binemnid hebbiu endi binemnian ne mag. so ik it uuitandi dadi so unvuitandi. so mid gilouon so mid ungilouon. so huat so ik thes gideda thes uuithar godas uuillion uuari. so vuakondi so slapandi. so an dag so an nahta so an huilikaru tidi so it uuari. so gangu ik allas an thes alomahtigon godas mundburd. endi an sina ginatha. endi nu don ik is allas hluttarliko minan bigihton. goda alomahtigon fadar. endi allon sinan helagon. endi thi godas manna. Gerno an godas uuillion te gibotianna. endi thi biddiu gibedas. that thu mi te goda githingi vuesan vuillias. that ik min lif endi minan gilouon an godas huldion giendion moti.

Aus: Niemeyer Verlag Althochdeutsches Lesebuch
Handschrift: Düsseldorf Landesbibliothek Cod. D2 S.204a-205a