Bairischer Psalm 138
10. Jahrhundert bairisch

Uellet ir gihoren         Daviden den guoton,
den sinen touginon sin?         er gruozte sinen trohtin:
Ia gichuri du mih, trohtin,         inte irchennist uuer ih pin,
fone demo aneginne         uncin an daz enti.


5

Ne megih in gidanchun         fore dir giuuanchon:
du irchennist allo stiga,         se uuarot so ih ginigo;
So uuare sose ih cherte minen zoum,         so rado nami dus goum:
den uuech furiuuorhtostu mir,         daz ih mih cherte after dir.
Du hapest mir de zungun         so fasto piduungen,


10

daz ih ane din gipot         ne spricho nohein uuort.
Uuie michiliu ist         de din giuuizida, Christ,
fone mir ce dir gitan!         uuie mahtih dir intrinnen!
Far ih uf ze himile,         dar pistu mit herie,
ist ze hello min fart,         dar pistu geginuuart:


15

ne megih in nohhein lant,         nupe mih hapet din hant.
Nu uuillih mansleccun         alle fone mir gituon,
alle die mir rieton         den unrehton rihtuom.
Alle die mir rietun         den unrehton rihtuom,
die sint fienta din,         mit den uuillih gifeh sin;


20

De uuider dir uuellent tuon,         de uuillih fasto nidon,
alle durh dinen ruom         mir ze fiente tuon.
Du got mit dinero giuualt         scirmi iogiuuedrehalp,
mit dinero chrefti         pinim du mo daz scefti,
ne la du mos de muozze,         daz er mih se ane skiozze.


25

De sela uuorhtostu mir,         die pisazi du mir.
du uurti sar min giuuar,         so mih de muoter gipar.
Noh trof ih des ne lougino,         des du tati tougino,
nupe ih fone gipurti         ze erdun aver uurti.
Far ih in de finster,         dar hapest du mih sar:


30

ih uueiz daz din nacht mach         sin so lioht also tach.
So uuillih danne file fruo         stellen mino federa:
peginno ih danne fliogen,         sose er ne tete nioman.
Peginno ih danne fliogen,         sose er ne tete nioman,
so fliugih ze enti ienes meres:         ih uueiz daz du mih dar irferist:


35

ne megih in nohhein lant,         nupe mih hapet din hant.
Nu chius dir fasto ze mir,         upe ih mih chere after dir;
du ginadigo got,         cheri mih framort:
mit dinen ginadun         gihalt mih dir in euun.

Aus: Niemeyer Verlag Althochdeutsches Lesebuch
Handschrift: Wien Österreichische Nationalbibliothek Cod.1609 S.69r+v