Freisinger Paternoster 9. Jahrhundert Freising bairisch

Pater noster qui es in celis. Fater unser, du pist in himilum. Mihhil gotlich ist, daz der man den almahtigun truhtin sinan fater uuesan quidit. karisit denne, daz allero manno uuelih sih selpan des uuirdican gatoe, cotes sun ze uuesan.
Sanctificetur nomen tuum. Kauuihit si namo din. Nist uns des duruft, daz uuir des dikkem, daz der sin namo kauuihit uuerda, der eo uuas uuih enti eo ist; uzzan des dikkames, daz der sin namo in uns kauuihit uuerda, enti de uuihnassi, de uuir in deru taufi fona imo intfengun, daz uuir de ze demu suonotakin furi inan kahaltana pringan muozin.
Adveniat regnum tuum. Piqhueme rihhi din. sin richi uuas eo enti eo ist: uzzan des dikkames, daz daz sin richi uns piqhueme enti er in uns richisoia, nalles der tiuual, enti sin uuillo in uns uualte, nalles des tiuuales kaspanst. Fiat voluntas tua sicut in caelo et in terra. Uuesa din uuillo, sama so in himile est, sama in erdu, daz nu so unpilipono enti so erlicho soso de engila in demu himile dinan uuillun arfullant, des mezzes uuir inan arfullan muozzin. Panem nostrum cotidianum da nobis hodie. Pilipi unsraz emizzigaz kip uns eogauuanna. In desem uuortum sint allo unsro licmiscun durufti pifankan. Nu auar, euuigo, forkip uns, truhtin, den dinan lichamun enti din pIuot, daz uuir fona demu altare intfahames, daz iz uns za euuigera heili enti za euuikemo lipe piqhueme, nalles za uuizze; enti din anst enti dino minna in uns follicho kahalt.
Et dimitte nobis debita nostra, sicut et nos dimittimus debitoribus nostris. Enti flaz uns unsro sculdi, sama so uuir flazzames unsrem scolom. makannotduruft allero manno uuelihhemo, sih selpan desem uuortum za pidenchennæ, daz allero manno uuelih sinemu kanoz enti sinemu proder er allemu hugiu enti hercin sino missitati flazze, daz imu der truhtin sama deo sino flaze. danna er demu sinemu kanozze flazan ni uuili, dana ni flazzit imu sama der truhtin, danna er qhuidit: 'flaz uns sama so uuir flazammes'.
Et ne nos inducas in temptationem. Enti ni princ unsih in chorunka. ni flaz unsic, truhtin, den tiuual so fram gachoron soso sin uuillo si, uzzan soso uuir mit dinera anst enti mi dinem ganadon ubaruuehan mekin.
Sed libera nos a malo. Uzzan kaneri unsih fona allem sunton, kalitanem enti antuuartem enti cumftichem. Amen.

Aus: Niemeyer Verlag Althochdeutsches Lesebuch
Handschrift: München Clm. 6330 S.70v-71r