Hildebrandslied
      8. Jahrhundert Fulda

      Ik gihorta dat seggen,
      dat sih urhettun         ænon muotin,
      Hiltibrant enti Hadubrant         untar heriun tuem.
      sunufatarungo         iro saro rihtun.
      5
      garutun se iro gudhamun,         gurtun sih iro suert ana,
      helidos, ubar hringa,         do sie to dero hiltiu ritun,
      Hiltibrant gimahalta:         her uuas heroro man,
      ferahes frotoro;         her fragen gistuont
      fohem uuortum,         hwer sin fater wari
      10
      fireo in folche,         ...................
      ..................         'eddo hwelihhes cnuosles du sis.
      ibu du mi enan sages,         ik mi de odre uuet,
      chind, in chunincriche:         chud ist mir al irmindeot'.
      Hadubrant gimahalta,         Hiltibrantes sunu:
      15
      'dat sagetun mi         usere liuti,
      alte anti frote,         dea erhina warun,
      dat Hiltibrant hætti min fater:         ih heittu Hadubrant.
      forn her ostar giweit,         floh her Otachres nid,
      hina miti Theotrihhe         enti sinero degano filu.
      20
      her furlaet in lante         luttila sitten
      prut in bure,         barn unwahsan,
      arbeo laosa:         her raet ostar hina.
      des sid Detrihhe         darba gistuontun
      fateres mines:         dat uuas so friuntlaos man.
      25
      her was Otachre         ummet tirri,
      degano dechisto         miti Deotrichhe.
      her was eo folches at ente:         imo was eo fehta ti leop:
      chud was her...         chonnem mannum.
      ni waniu ih iu lib habbe'...
      30
      'wettu irmingot         obana ab hevane,
      dat du neo dana halt mit sus sippan man
      dinc ni gileitos'...
      want her do ar arme         wuntane bauga,
      cheisuringu gitan,         so imo se der chuning gap,
      35
      Huneo truhtin:         'dat ih dir it nu bi huldi gibu'.
      Hadubrant gimahalta,         Hiltibrantes sunu:
      'mit geru scal man         geba infahan,
      ort widar orte.         ................
      du bist dir alter Hun,         ummet spaher,
      40
      spenis mih mit dinem wortun,         wili mih dinu speru werpan.
      pist also gialtet man,         so du ewin inwit fortos.
      dat sagetun mi         seolidante
      westar ubar wentilseo,         dat inan wic furnam:
      tot ist Hiltibrant,         Heribrantes suno'.
      45
      Hiltibrant gimahalta,         Heribrantes suno:
      'wela gisihu ih in dinem hrustim,
      dat du habes heme         herron goten,
      dat du noh bi desemo riche         reccheo ni wurti'.-
      'welaga nu, waltant got,         wewurt skihit.
      50
      ih wallota sumaro enti wintro         sehstic ur lante,
      dar man mih eo scerita         in folc sceotantero:
      so man mir at burc enigeru         banun ni gifasta,
      nu scal mih suasat chind         suertu hauwan,
      breton mit sinu billiu,         eddo ih imo ti banin werdan.
      55
      doh maht du nu aodlihho,         ibu dir din ellen taoc,
      in sus heremo man         hrusti giwinnan,
      rauba birahanen,         ibu du dar enic reht habes'.
      'der si doh nu argosto         ostarliuto,
      der dir nu wiges warne,         nu dih es so wel lustit,
      60
      gudea gimeinun:         niuse de motti,
      hwerdar sih hiutu         dero hregilo rumen muotti,
      erdo desero brunnono         bedero uualtan'.
      do lettun se ærist         asckim scritan,
      scarpen scurim:         dat in dem sciltim stont.
      65
      do stoptun to samane         staim bort chludun,
      heuwun harmlicco         huitte scilti,
      unti im iro lintun         luttilo wurtun,
      giwigan miti wabnum         ................

      Aus: Niemeyer Verlag Althochdeutsches Lesebuch
      Handschrift: Kassel Bibliothek Hs.Theol.fol.54 S.1a/76b