Lorscher Beichte 9. Jahrhundert Lorsch rheinfränkisch

Ih gihu gote alamahtigen fater inti allen sinen sanctin inti desen uuihidon inti thir gotes manne allero minero sunteno, thero ih gidahda inti gisprah inti gideda, thaz uuidar gote uuari inti daz uuidar minera christanheiti uuari inti uuidar minemo gilouben inti uuidar mineru uuihun doufi inti uuidar mineru bigihdi. Ih giu nides, abunstes, bispraha, sueriennes, firinlustio, zitio forlazanero, ubermuodi, geili, slafheiti, tragi gotes ambahtes, huoro uuilleno, farligero, inti mordes inti manslahta, ubarazi, ubartrunchi. Ih gihu, thaz ih minan fater inti mina muater so ni ereda so ih scolda, inti daz ih minan hereron so ni ereda so ih scolda, inti inan so ni minnoda so ih scolda, inti mine nahiston so ni minnoda so ih scolda, inti min uuip inti min kind so ni minnoda inti leerda so ih scolda, inti mine iungeron so ni leerda inti ni minnoda so ih scolda, indi mine fillola so ni ereda indi ni leerda so ih scolda. Ih gihu, thaz ih then uuihon sunnundag inti thia heilagun missa so ni ereda inti ni marda so ih scolda. Ih gihu, daz ih minan decemon ni fargalt so ih scolda, thaz ih stal inti ferstolan fehota. Ih gihu, thaz ih siohero ni uuisoda, serege ni gidrosda, gast nintfianc so ih scolda, gisahane ni gisuonda thie ih gisuenen mohda, thaz ih meer giuuar inti unsipberon gisageda thanne ih scoldi. Ih gihu, thaz ih daz giloupda thaz ih gilouben ni scolda, thaz ih ni gilaupta thaz ih gilouben scolta. Ih gihu unrehtero gisihto, unrehtera gihorida, unrehtero gidanco, unrehdero uuordo, unrehdero uuerco, unrehtero sedelo, unrehtero stadalo, unrehtero legero, unrehtero gango, unrehtes anafanges, unrehtero cosso. Ih gihu, thaz ih minan heit brah, meinan heit suuor in uuihidon inti bi gotes heilogon. Ih gihu ungihorsami, ungithulti, untriuuono, abulges inti strites. Ih gihu, thaz ih heilac ambaht inti min gibet ruoholoso deda inti daz ih daz uuiha uuizzod unbigihtic inti unuuirdic nam, inti daz so ni hialt inti so ni ereda so ih scolta, inti daz heilaga cruci so ni ereda noh ni gidruog so ih scolda, noh thero gibennithero fastono inti thero crucithrahto so ni erfulta noh ni hialt so ih scolda. Ih gihu, thaz ih biscoffa inti priesda inti gotes man so ni ereda inti ni minnoda so ih scolda, meer sprah inti suuigeda thanne ih scolti. Ih gihu, daz ih mih selbon mit lustin inti mit argen uuillon int mit argen githancon biuual int giunsubrida meer thanne ih scoldi. Thes alles inti anderes manages thes ih uuidar gotes uuillen gifrumita inti uuidar minemo rehde, so ih iz bi uuizzantheiti dadi so unuuizzandi, so ih iz in naht dadi so in dag, so ih iz slafandi dadi so uuahhandi, so ih iz mit uuillen dadi so ana uuillon: so uuaz so ih thes alles uuidar gotes uuillen gidadi, so gan ih es in gotes almahtigen muntburt inti sino ginada inti in lutarliha bigiht gote almahtigen inti allen sinen sanctin inti thir gotes manne mit gilouben inti mit riuuuon inti mit uuillen zi gibuozanne, inti bitdiu thih mit otmuodi thaz thu giuuerdos gibeton furi mih, thaz druhdtin thuruh sino ginada giuuerdo mir farlazan allo mino sunda.

Aus: Niemeyer Verlag Althochdeutsches Lesebuch
Handschrift: Vatikan Bibliothek Cod.Pal.485 S.2b-3b