Memento mori
      11./12. Jahrhundert alemannisch

      Nv denchent wib unde man
      war ir sulint werdan
      ir minnont tisa brodemi.
      unde wanint iemer hie sin.
      5
      si ne dunchet iv nie so minnesam.
      eina churza wila sund ir si han.
      ir ne lebint nie so gerno manegiv zit
      ir muozent verwandelon disen lib.

      Ta hina ist ein michel menegi.
      10
      sie wandan iemer hie sin.
      sie minnoton tisa wencheit.
      iz ist in hivto vil leit.
      si ne duhta sie nie so minnesam.
      si habent si ie doh uerlazen.
      15
      ich ne weiz war sie sint gevarn.
      got muozze so alle bewarn.

      Sie hvgeton hie ze lebinne.
      sie gedahton hin ze uarne
      ze der ewigin mendi
      20
      da sie iemer solton sin.
      wie luzel sie des gedahton
      war sie ze iungest uarn solton.
      nu habint siv iz bewnden.
      sie warin gerno erwnden.

      25
      Paradysum daz ist verro hinnan
      tar chom vil selten dehein man.
      taz er her wider wnde
      unde er uns taz mare brunge.
      ald er iv daz gesageti
      30
      weles libes siv dort lebetin.
      sulnd ir iemer da genesen
      ir muozint iv selbo die boten wesen.

      Tisiv werlt ist also getan
      swer zuo ir beginnet van.
      35
      si machot iz imo alse wvnderlieb
      uon ir chom ne mag er niet.
      so begriffet er iro gnvoge
      er habeti ir gerno mera.
      taz tuot er unz an sin ende.
      40
      so ne habit er hie noh tenne.

      Ir wanint iemer hie lebint.
      ir mvozt is ze iungest reda ergeben.
      ir svlent all ersterben.
      ir ne mugent is niewit uber werden.
      45
      ter man einer stuntwilo zergat
      also skiero so div brawa zesamine geslat.
      Tes wil ih mih uermezzen.
      so wirt sin skiero uergezzen.

      got gescuof ivh allo.
      50
      ir chomint uon einimanne.
      to gebot er iv ze demo lebinne.
      mit minnon hie ze wesinne.
      taz ir warint als ein man.
      taz hant ir ubergangen.
      55
      habetint ir anders niewit getan.
      ir muosint is iemer scaden han.

      Toh ir chomint alle uon einiman.
      ir bint iedoh geskeiden
      mit manicvalten listen.
      60
      mit michelen unchusten.
      ter eino ist wise unde uruot.
      ter ander tumbo unde unguot.
      ............................
      ............................

      65
      ............................
      ............................
      ............................
      tes wirt er verdamnot.
      tes rehten bedarf ter armo man.
      70
      tes mag er leidor niewit han.
      er ne chovf iz also tivro.
      tes varn se al ze hello.
      Gedahtin siv denne.
      wie iz vert an dem ende.

      75
      so uert er hina dur not.
      so ist er iemer furder tot.
      wanda er daz reht uerchovfta
      so uert er in die hella.
      da mvoz er iemer inne wesen.
      80
      got selben hat er hin gegeben.

      Vbe ir alle einis rehtin lebitint.
      so wvrdint ir alle geladet in.
      ze der ewigun mendin.
      da ir iemer soltint sin.
      85
      taz eina hant ir iv selben.
      uon diu so ne mugen ir drin gen.
      daz ander gebent ir dien armen.
      ir muozint iemer deruor sten.

      Gesah in got taz er ie wart
      90
      ter da gedenchet an die langun uart.
      der sih tar gewarnot.
      so got selbo gebot.
      taz er gar ware
      swa er sinen boten sahe.
      95
      taz sag ih in triwon
      er chvmit ie nohwennon.

      nechein man ter ne ist so wise.
      ter sina uart wizze.
      ter tot ter bezeichint ten tieb.
      100
      iuer ne lat er hie niet.
      er ist ein ebenare.
      neheiman ist so here
      er ne mvoze ersterbin.
      tes ne mag imo der skaz ze gvote werden.

      105
      Habit er sinin richtvom so geleit
      daz er vert an arbeit.
      ze den sconen herbergon
      uindit er den suozzin lon.
      des er in dirro werlte niewit gelebita.
      110
      so luzil rivit iz in da.
      in dunchit da bezzir ein iar.
      tenne hier tusinc te ist war.

      Swes er hie uerleibet
      taz wirt imo ubilo geteilit.
      115
      habit er iet hina gegebin
      tes muoz er iemer furdir leben.
      er tvo iz unz er wol mac
      hie noh chumit der tac.
      habit er is tenne niwit getan.
      120
      so ne mag er iz nie gebvozan.

      Ter man ter ist niwit wise.
      ter ist an einer uerte.
      einin bovm uindit er sconen.
      tar undir gat er ruin
      125
      so truchit in der slaf ta.
      so uergizzit er dar er scolta.
      als er denne ufspringit
      wie ser iz in denne riwit.

      Ir bezeichint allo den man.
      130
      ir muozint tur not hinnan.
      ter bovm bezeichint tisa werlt.
      ir bint etewaz hie vertuelit.
      ir hugetont hie ze lebinne.
      ir ne dahtont hin ze uarne.
      135
      ...........................
      ...........................

      diu vart diu dunchit iuh sorcsam.
      ir chomint dannan obinan.
      tar mvozint ir bewinden.
      140
      taz sunder wol beuindin
      ir ilint allo wol getuon.
      ir ne durfint sorgen umbe den lon.
      so wol imo der da wol getvot.
      is wirt imo wola gelonot.

      145
      Ia du uil ubeler mundus
      wie betriugist tu uns sus.
      du habist uns gerichin.
      des sin wir allo besvichin.
      wir ne uerlazen dih ettelichiu zit
      150
      wir uerliesen sele unde lib.
      also lango so wir hie.lebin.
      got habit uns selbwala gegibin.

      Trohtin chunic here.
      nobis miserere.
      155
      tu mvozist uns gebin ten sin.
      tie churzun wila so wir hie sin.
      daz wir die sela bewarin.
      wanda wir dur not hinnan sulen uarn.
      fro so mvozint ir wesin iemer.
      160
      daz machot all ein noker

      Aus: Reclam Althochdeutsche poetische Texte
      Handschrift: Straßburg Bibliothèque municipale cod Germ 278 S.154v-155r