Muspilli
      9. Jahrhundert bairisch

      ...sin tac piqueme,         daz er touuan scal.
      uuanta sar so sih diu sela         in den sind arheuit,
      enti si den lihhamun         likkan lazzit,
      so quimit ein heri         fona himilzungalon,
      5
      daz andar fona pehhe:         dar pagant siu umpi.
      sorgen mac diu sela,         unzi diu suona arget,
      za uuederemo herie         si gihalot uuerde.
      uuanta ipu sia daz Satanazses         kisindi kiuuinnit,
      daz leitit sia sar         dar iru leid uuirdit,
      10
      in fuir enti in finstri:         daz ist rehto uirinlih ding.
      upi sia auar kihalont die         die dar fona himile quemant,
      enti si dero engilo         eigan uuirdit,
      die pringent sia sar uf in himilo rihi:
      dar ist lip ano tod,         lioht ano finstri,
      15
      selida ano sorgun:         dar nist neoman siuh.
      denne der man in pardisu         pu kiuuinnit,
      hus in himile,         dar quimit imo hilfa kinuok
      pidiu ist durft mihhil
      allero manno uuelihemo,         daz in es sin muot kispane,
      20
      daz er kotes uuillun         kerno tuo
      enti hella fuir         harto uuise,
      pehhes pina:         dar piutit der Satanasz altist
      heizzan lauc.         so mac huckan za diu,
      sorgen drato,         der sih suntigen uueiz.
      25
      uue demo in uinstri scal         sino uirina stuen,
      prinnan in pehhe:         daz ist rehto paluuic dink,
      daz der man haret ze gote         enti imo hilfa ni quimit.
      uuanit sih kinada         diu uuenaga sela:
      ni ist in kihuctin         himiliskin gote,
      30
      uuanta hiar in uuerolti         after ni uuerkota.
      So denne der mahtigo khuninc         daz mahal kipannit,
      dara scal queman         chunno kilihaz:
      denne ni kitar parno nohhein         den pan furisizzan,
      ni allero manno uuelih         ze demo mahale sculi.
      35
      dar scal er uora demo rihhe         az rahhu stantan,
      pi daz er in uuerolti         kiuuerkot hapeta.
      Daz hortih rahhon         dia uueroltrehtuuison,
      daz sculi der antichristo         mit Eliase pagan.
      der uuarch ist kiuuafanit,         denne uuirdit untar in uuic arhapan.
      40
      khenfun sint so kreftic,         diu kosa ist so mihhil.
      Elias stritit         pi den euuigon lip,
      uuili den rehtkernon         daz rihhi kistarkan:
      pidiu scal imo helfan         der himiles kiuualtit.
      der antichristo         stet pi demo altfiant,
      45
      stet pi demo Satanase,         der inan uarsenkan scal:
      pidiu scal er in deru uuicsteti         uunt piuallan
      enti in demo sinde         sigalos uuerdan.
      doh uuanit des uilo ... gotmanno,
      daz Elias in demo uuige         aruuartit uuerde.
      50
      so daz Eliases pluot         in erda kitriufit,
      so inprinnant die perga,         poum ni kistentit
      enihc in erdu,         aha artruknent,
      muor varsuuilhit sih,         suilizot lougiu der himil,
      mano uallit,         prinnit mittilagart,
      55
      sten ni kistentit,         uerit denne stuatago in lant,
      uerit mit diu uuiru         uiriho uuison:
      dar ni mac denne mak andremo         helfan uora demo muspille.
      denne daz preita uuasal         allaz uarprinnit,
      enti uuir enti luft         iz allaz arfurpit,
      60
      uuar ist denne diu marha,         dar man dar eo mit sinen magon piehc?
      diu marha ist farprunnan,         diu sela stet pidungan,
      ni uueiz mit uuiu puaze:         so uerit si za uuize.
      Pidiu ist demo manne so guot,         denner ze demo mahale quimit,
      daz er rahono uueliha         rehto arteile.
      65
      denne ni darf er sorgen,         denne er ze deru suonu quimit.
      ni uueiz der uuenago man,         uuielihan uuartil er habet,
      denner mit den miaton         marrit daz rehta,
      daz der tiuual dar pi         kitarnit stentit.
      der hapet in ruouu         rahono uueliha,
      70
      daz der man er enti sid         upiles kifrumita,
      daz er iz allaz kisaget,         denne er ze deru suonu quimit;
      ni scolta sid manno nohhein         miatun intfahan.
      So daz himilisca horn kilutit uuirdit,
      enti sih der suanari         ana den sind arheuit
      75
      der dar suannan scal         toten enti lepenten,
      denne heuit sih mit imo         herio meista,
      daz ist allaz so pald,         daz imo nioman kipagan ni mak.
      denne uerit er ze deru mahalsteti,         deru dar kimarchot ist:
      dar uuirdit diu suona,         die man dar io sageta.
      80
      denne uarant engila         uper dio marha,
      uuechant deota,         uuissant ze dinge.
      denne scal manno gilih         fona deru moltu arsten.
      lossan sih ar dero leuuo uazzon:         scal imo auar sin lip piqueman,
      daz er sin reht allaz         kirahhon muozzi,
      85
      enti imo after sinen tatin         arteilit uuerde.
      denne der gisizzit,         der dar suonnan scal
      enti arteillan scal         toten enti quekkhen,
      denne stet dar umpi         engilo menigi,
      guotero gomono:         gart ist so mihhil:
      90
      dara quimit ze deru rihtungu so uilo         dia dar ar resti arstent.
      so dar manno nohhein         uuiht pimidan ni mak,
      dar scal denne hant sprehhan,         houpit sagen,
      allero lido uuelihc         unzi in den luzigun uinger,
      uuaz er untar desen mannun         mordes kifrumita.
      95
      dar ni ist eo so listic man         der dar iouuiht arliugan megi,
      daz er kitarnan megi         tato dehheina,
      niz al fora demo khuninge         kichundit uuerde,
      uzzan er iz mit alamusanu furimegi
      enti mit fastun         dio uirina kipuazti.
      100
      denne der paldet         der gipuazzit hapet,
      denner ze deru suonu quimit.
      uuirdit denne furi kitragan         daz frono chruci,
      dar der heligo Christ         ana arhangan uuard.
      denne augit er dio masun,         dio er in deru menniski anfenc,
      105
      dio er duruh desse mancunnes         minna fardoleta.

      Aus: Niemeyer Verlag Althochdeutsches Lesebuch
      Handschrift: München Bayerische Staatsbibliothek clm 14098 S.61r,119v,120rv,121rv