Tierer Capitulare 9. Jahrhundert Trier moselfränkisch

That ein iouuelihc man frier geuualt have, so uuar sose er uuilit sachun sinu ce gevene. Souuerse sachun sinu thuruhc salichedi selu sineru athe ce anderru eraftlicheru stat athe gelegenemo sinemo athe seuuemo andremo versellan uuilit, inde ce themo cide inneneuuendiun theru selveru grasceffi uuisit, in theru sachun thie gesat sint, uuizzetathia sala ce gedune gevlize. That avo themo selvemo cide that er thui sellan uuilit uzzeneuuendiun theru grasceffi uuisit, that ist athe in here athe in palice athe in anderu sumeuuelicheru stedi, samant neme himo athe vane sinen gelandun athe vane andern, thie theru selveru uuizzidi leven theru er selvo levit, urcundun retliche; avur avo´r thie havan ni mach, thane vane andern souueliche thar bezzera vundan mugen uuerthan: inde vora hin sachunu sineru salunga gedue, inde burigun theru geuueri geve himo ther thia sala infahit geuueri gedue. Inde ather thiu thiu sala so getan uuirthit, geanervo sin selves neieina vona then vora gequetanen sachun mugi geduan irvangida. Thara uviri inde selvo thuruch sich burigun gedue theru selveru geuueri, nio themo geanerven thegein ursach belive thia sala ce bekerine, sunder mera not ana lige thia thuruch ce gefremine. Inde avo nochthanne sachun sinu bit geanervun sinen gesunduruth ne havoda, ne si himo that ce ungevuorsamithu, sunder geanervo siner, avo er gerno ne uuilit, athe thuruch then gravun athe thuruch bodun sinin bethungen uuerthe, that thia sundrunga bit themo due ce themo ther geendido ervetha sina uuolda vollocaman. Inde avo sumeuuelicheru samonungun thia sellan bat, ganervo siner then uuizzut bit theru kirichun vona themo vora gesprochenemo erve have, that bit andremo geanerven sinemo havan solda. Inde thaz behaldan uuerthe umbe then vader inde then sun inde then nevun unce ceb iarun uuizzethallikhen: ather thiu selve sachun ce theru muzzungu theru selveru samunungun ergeven.

Aus: Niemeyer Verlag Althochdeutsches Lesebuch