Wessobrunner Hymnus und Gebet
ca. 814 Wessobrunn bairisch

Dat gafregin ih mit firahim         firiuuizzo meista,
Dat ero ni uuas         noh ufhimil,
noh paum         noh pereg ni uuas,
ni nohheinig         noh sunna ni scein,


5

noh mano ni liuhta,         noh der mareo seo.
Do dar niuuiht ni uuas         enteo ni uuenteo,
enti do uuas der eino         almahtico cot,
manno miltisto,         enti dar uuarun auh manake mit inan
cootlihhe geista.         enti cot heilac...

Cot almahtico, du himil enti erda gauuorahtos, enti du mannun so
manac coot forgapi, forgip mir in dino ganada rehta galaupa enti
cotan uuilleon, uuistóm enti spahida enti craft, tiuflun
za uuidarstantanne enti arc za piuuisanne enti dinan uuilleon
za gauurchanne.

Aus: Reclam Althochdeutsche poetische Texte
Handschrift: München Bayerische Staatsbibliothek clm 22053 S.65v-66r